English
Manyika
Ndau
Shona
Mweya Wako Waiya Wakafa. Ukazobarwa KeChipiri
China, 26 Gumiguru 2023
*Tiri kuda kugumisa zvinofundiswa izvi kuvanhu veshe, pashi reshe.* Chipo chako kudetsera pamushando uyu. Unokona kuchituma neEcoCash pa: *151*2*5*58225# Mwari vakufumisei
Ndiye soro romuiri, Chiara; ndiye maambo. Dangwe rokumuka kubva kwevakafa, kuti iye aite mukuru muzviro zveshe (VaKhorose 1 ndima 18).
Mundima iyi mune mazwi anoti, Dangwe rokumuka kubva kwevakafa. Vakawanda avazwisisi mazwi aya. Vanofunga kuti anoronza kuti Jesu ndivo vekutanga kumuka kubva kuvakafa. Asi izvi azvisirizvo. Mambo Jesu avasirivo vokutanga kufa vechimuka. Kune vaiya vakambofa vakamuka. Phauri ndiye wakanyora mazwi etabeura ndiwo aya. Mweya Wakachena ndivo vakamufemera kuanyora. Waiya asiri kuronza ngezvekufa, munhu echimuka. Waiya ari kuronza ngezvekufa kwomweya womunhu. Zvishaishi zvedu zvaiya zvaiswa panaJesu. Zvakaiswa pevari, vari pamuchinjiko. Izvi ndizvo zvakaita kuti mweya wavo ufe. Mweya unofa kana uchinge waduswa pana Mwari. Mweya wakadaro unenge uchisisira kubarwa kechipiri. Ndikwo kuti uponezve. Izvi ndizvo zvakaitika kuna Jesu. Mweya wavo waiya wafa. Ukazobarwa kechipiri.
Jesu vakakohomerwa pamuchinjiko. Apa ndipo pevakasiiwa ndiMwari. Izvi zvakavarwadza yaamho. Zvakaita kuti vacheme. Tinoerenga mazwi avo muna Marako 15 ndima 34. Inoti, Ngeawa rechipfumbamwe Jesu wakadaidzira ngeizwi guru echiti, �Eloi! Eloi! Lama Sabakathani?� Ukwo kunoti ngokukumuchwa, �Mwari wangu! Mwari wangu! Wandisiya ngenyi? Jesu vaiya vaitwa chipiriso chechishaishi. Ndizvo vaiya vaitwa chishaishi. Ndiyo ndaa Mwari vakavasiya kudaro. 2 VaKhorinte 5 ndima 21 inoti, Iye wakamuita kushaisha ngendaa yedu, uwo waiya asikazi kuzia kushaisha, kuti mwaari isusu tiite kururama kwaMwari .
Jesu vakakohomerwa havo pamuchinjiko. Vakaendeswa kudzara remuriro. Asi vona vaiya vasina ndaa. Vaiya vasina chishaishi. Ndizvo mupango waisatendera kuti vauraiwe kudaro. Isusu tisu taisisira kuenda kudzara uku remuriro. Asi Jesu vakatsanangura vemene kuendeyo. Vechitsvaka kuti isusu tisazosisira kuendeyo. Vakagumeyo vakarwisana naSathani. Vakamunyisa. Vakanyisawo vabati vake veshe. VaKhorose 2 ndima 15 inotsanangura kurwa uku. Inoti, Wakadusapo vatongi nevanesimba, akavabudisa pamhene, echinyisa ndiwo.
Akuna mweya wakambomuka kubva kuvakafa. Kune vanhu vakasienda kudzara remuriro. Akuna naumwe wavo wakakona kubudeyo. Jesu vega ndivo vakakona kubuda. Vakatora zvirango zvomunhu weshe. Asi vona vaiya vakarurama. Saka mupango waiya waa kusisirawo kutendera kuti vashaishi vapuwe kururama kwaJesu. Isusu tisu taiya tiri vashaishi. Asi Jesu vakatsanangura kuti vazwi ndivo vakashaisha. Vechitsvaka kuti isusu tizozwi tisu vakarurama vakhona.
Hino pouri ndipo paa kuonekwa kururama kwavo. Kururama kwavo ndikwo kwewaa nakwo iwewe. Ngokuti vakakufira. Vakazomuka kubva kuvakafa. Iwewe wakamukawo navo kubva kuvakafa. Kuronza kuti newewo wakabarwa kechipiri. Uchibarwa kudaro watsanduka dzinza. Waa wengazi idzva. Izvi ndizvo zvetinoona muna vaRoma 6 ndima 4. Inoti, Ndizvo takaikwa pamwepo naye ngokubhabhatidzwa murufu, ndizvo kudai ndiKristu akamuswa kubva kwevakafa ngouthende hwaBaba, ngokudaro isusuwo tihambe mukupona kutsva. Hareruya!
Kumbira Weiti
Baba vendinoda. Ndinomubonga. Jesu vakandifira pamuchinjiko. Ndivo vakaa chishaishi. Vechitsvaka kuti inini ndiitwe wakarurama. Kururama kwenyu kunozoonekwa pendiri. Ndizvo kururama kwenyu kunoonekwa pendiri nyamashi. Muzina raJesu. Ameni.
Dzimweni Ndima Dzinotsinhira Kufunda KwaNyamashi:
WaRoma 5 ndima 17
1 WaKorinde 1 ndima 30
(Chidzidzo ichi chatorwa kubva mu:
Rhapsody of Realities (Ndau)
Ringonyorwa ndi:
Mufundisi Chris Oyakhilome DSc DD.
Mungoriwona pa: https://rhapsodylanguages.tniglobal.org/regions/
Zvina zvidzidzo mungozviwona pa: https://bit.ly/Shona_Church