Kururama Kune Zviro Zvitatu Zvakakosha

Chipiri, 1 Gumiguru 2024

*Tiri kuda kugumisa zvinofundiswa izvi kuvanhu veshe, pashi reshe.* Chipo chako kudetsera pamushando uyu. Unokona kuchituma neEcoCash pa: *151*2*6*58225# Mwari vakufumisei

Kudai, ngokuti munhu umwe wakashaisha, rufu rwakatonga kubudikidza ngomunhu umwe, kakurutu avo vanoashira ngokuwanda kwenyasha dzakawanda nechipo chokururama vanozotonga mukururama kubudikidza ngomunhu umwe, Jesu Kristu (VaRoma 5 ndima 17).

Hunhu hwaMwari hunokona kutsanangurwa ngenjira dzakawanda. Imweni yetsananguro yakhona inoonesa kururama kwavo. Mwari vakarurama. Ndiyo ndaa vasikaposhi. Ndiyo ndaa vechingoita zvakanaka zvega. Mwari avakoni kuita zviro zvakashata. Avakoni kuposha. Ivo ndiMwari. Zvevanoita ivo ndizvo zvakanaka zvakhona. Avabiridziri. Avaposhi. Avashaishidzi.

Kururama uku kunokonawo kuiswa mumweya womunhu. Izvi zvinobva zvaita kuti munhu uyu atodzane naMwari. Akonewo kuita zvakanaka zvega. Asaposha. Asashaishidza. Asabiridzira. Ichi ndicho chechipiri chetinoona pakururama. Mwari vanongotipa kururama kwavo. Atisisiri kuita kwokushandira. Mwari vanoisa kururama uku mumweya womunhu. Munhu uyu unobva atorurama saMwari. Mwoyo wake unobva wazia zvakarurama. Unobva watanga kukona kupinimidza zvakanaka zvega.

Kururama ndikwo kunoita kuti munhu akone kuashirwa ndiMwari. Ndikwo kunoita kuti munhu akone kuema pamberi paMwari. Ichi ndicho chechitatu chetinoona pakururama. Munhu uyu unozoema pamberi paMwari asikazwi somunhu akatukwa. Kana munhu asikazi kukodzera. Munhu wenyama aakoni kungoema pamberi paMwari. Mwari ndivo vanosisira kutanga vamuashira. Vomupa simba rokuema pamberi pavo. Echizoereketa navo asikatyi. Asikazwi seasikazi kukodzera. Kana seakatukwa.

Asi umweni ungabvunza echiti, Ko kana ndechizwa sendisikazi kukodzera kuema pamberi paMwari? Eya. Iwewe ungazwa hako soune ndaa yewakapara. Ungazwa hako sousikazi kukodzera kuema pamberi paMwari. Asi izvozvo azvironzi kuti unenge uchitoa nendaa yewakapara. Azvironzi kui unenge wakatotukwa zvegwinyiso. Azvironzi kuti unenge usikazi kukodzera kuema pamberi pavo. Ndizvo unenge uchisisira kuringira muIzwi raMwari pakadaro. Worifunda zvakadzama. Uchigara mipinimidzo yako iri periri. Izwi iri ndiro rinozodusa mipinimidzo iyi mwouri. Rechiita kuti usaramba uchizviona somunhu ane ndaa yaakapara.

Izwi raMwari rinosuka. Izvi ndizvo zvatinoziiswa muna Johani 15 ndima 3. Izwi raMwari iri rinokupawo simba rokugonda ndiMwari. Izvi ndizvo zvetinoona muna Zvakaitwa 20 ndima 32. 1 Johani 3 ndima 20 inotiwo, Naapo kudai mwoyo yedu yechitiitira ndaa; Mwari uri mukuru kupinda mwoyo yedu, naye unozia zviro zveshe. Izwi raMwari igurutu. Rinopinda zvoungazwa ngenyama yako. Ndiro rinobeura madziso emweya wako. Rechiita kuti uzie kuti waa munhu wedzinza riri. Ngokudaro rinoita kuti usazwa somunhu ane ndaa yaakapara. Rinoita kuti usazviona somunhu asikazi kukodzera kuema pamberi paMwari. Rinoita kuti ugutsikane kuti Mwari vanokudakarira. Hareruya!

Kumbira Weiti
Ndinomubonga Mambo. Mwakandipa kururama kwenyu. Ndaa munhu wedzinza renyu zvino. Ndizvo ndinodakara. Ndarurama semwi zvino. Ndizvo ndaa kukona kuita zviro ngomwazvo. Ndaa kukona kuita zviro zvakanaka. Ndechikona kuema pamberi penyu. Ndinoemapo ndisina chendinotya. Ndisikazwi sendine ndaa yendakapara. Kana somunhu asikazi kukodzera kuema pamberi penyu. Izwi renyu rinondipa mapinimidziro eMweya Wakachena. Ndizvo ndinopona somunhu akashinga. Ndechizia kuti ndakarurama semwi. Hareruya!

Dzimweni Ndima Dzinotsinhira Kufunda KwaNyamashi:
2 Vakorinde 5 ndima 21
Vafiripi 3 ndima 9
VaRoma 8 ndima 1 kusvika 4

(Chidzidzo ichi chatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Mungoriwana pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church