Takapiwa Simba ReKugadzirisa Nyika Ino

Chishanu, 14 Mbudzi 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

Asi tarirai. Ndichakutumirai chinhu chiya. Chamakavimbiswa naBaba vangu. Chichauya pamuri. Asi chimborambai muri muJerusarema. Kusvika mapiwa simba richabva kudenga (Ruka 24 ndima 49).

Ishe Jesu vakaita makore matatu vaine vadzidzi vavo. Vakazofa. Vakavigwa. Vakazomuka kuvakafa. Vadzidzi vakanga vaita nguva vachifamba naJesu ava. Vachivona minana yaiitwa naJesu. Vachinzwa dzidziso dzaJesu. Jesu ava vachiisa zvipo mumweya yavo. Saka vane zvavakanga vadzidza kuna Jesu ava. Vakanga vava neshoko rekuzivisa vanhu. Vakanga vapiwa basa. Vakanga vadzidziswa.

Asi vakanga vasiri kufanira kubva vatotanga basa iri. Ishe Jesu vakanga vavaraira. Izvi ndizvo zvatavona muna Ruka yemakumi maviri nena ndima yemakumi mana nepfumbamwe. Inoti, Asi tarirai. Ndichakutumirai chinhu chiya. Chamakavimbiswa naBaba vangu. Chichauya pamuri. Asi chimborambai muri muJerusarema. Kusvika mapiwa simba richabva kudenga. Vadzidzi ava vakanga vava nezvimwe zvose zvaidiwa. Kwakanga kwangosara chinhu chimwe chete. Chinhu ichi ndicho chakanga chavimbiswa naMwari Baba.

Chinhu chacho vakanga vari Mweya Mutsvene. Vadzidzi vaifanira kuva naMweya Mutsvene ava. Zvisizvo vakanga vasiri kuzogona kuita basa raMwari. Mweya Mutsvene ndivo vakanga vari kuzovabatsira kuriita. Ivo vachizogona kuriita nomazvo. Izvi ndizvovo zvakazoitika kuvadzidzi ava. Ruka ndiye anotizivisa izvi. Tinoverenga mashoko ake muna Mabasa yepiri ndima yegumi nena kusvika makumi mana neimwe. Ndima iyi inotsanangura zvakaitwa naPita. Ndiye uya Pita akanga amboramba kuti aiziva Jesu. Tinovona izvi muna Ruka yemakumi maviri nembiri ndima yemakumi matanhatu neimwe kusvika makumi matanhatu nembiri. Asi zvino Pita uyu akanga ava naMweya Mutsvene. Saka akamira akashinga. Akaparidzira vanhu. Mharidzo yake yakanga yakadzama chose. Yakatoita kuti vanhu zviuru zvitatu vaponeswe. Izvi ndizvo zvatinovona muna Mabasa yepiri ndima yegumi nena. Inoti, Pita akabva asimuka. Akasimuka pamwe chete nevamwe vadzidzi. Ivo vaya gumi nevaviri. Ndokubva atanga kutaura. Achidanidzira. Achivaparidzira. Achiti .

Pita haana kugumira apa. Akazombosimudza chirema. Apa akanga aina Johane. Vanhu vakabva vaungana. Iye akabva aparidza zvekare. Tinovona izvi muna Mabasa yechina ndima yechina. Inoti, Vazhinji vakange vatogamuchira shoko iri. Ivavo vaitosvika zviuru zvishanu. Vakanga vatowedzerwa kuvadzidzi. Uku kwakanga kuri kugona basa. Pita akanga ari kuita basa iri nekukasira. Achikasira saMwari. Mweya Mutsvene ndivo vakanga vari kubatsira Pita uyu. Saka akagona kusvitsa Ruponeso kuvanhu vakawanda. Achizviita nekukasira. Zviuru zvezviuru zvikabva zvaponeswa. Zvakaponeswa munguva doko doko.

Isu tina Mweya Mutsvene vamwe ivavo. Saka tiri kuitavo zvimwe chete izvi. Ivo vakatiita zvapupu zvinogona basa. Hatisi kutsvaka simba raMweya Mutsvene. Tinotova nesimba raMweya Mutsvene iri. Izvi ndizvo zvatinoziviswa muna Mabasa yekutanga ndima yesere. Tine simba ratakapiwa. Simba iri rinoita kuti tigone kugadzirisa nyika yedu. Tiri vashumiri vanogona basa. Izvi ndizvo zvatinoziviswa mutsamba yechipiri kuVakorinde chitsauko chetatu ndima yeshanu kusvika yetanhatu. Tiri kushandura nyika ino. Tiri kuita basa ratakatumwa naMwari. Tiri kuita basa racho nomazvo. Tichitonga zvinhu zvenyika ino. Simba raMwari richivonekwa pachena.

Tiri kufambirana naMweya Mutsvene. Izvi ndizvo zvinotaura Bhaibheri. Tinoverenga mashoko aro aya muna Varoma yepfumbamwe ndima yemakumi maviri nesere. Inoti, Nokuti Ishe ndivo vachaita basa iri. Vachariita panyika pano. Vachiriita nekukasira. Mukururama. Basa iri hariitwi nesimba revanhu. Rinoitwa naMweya vaMwari. Tiri kuriita tichishandisa mazano aMwari. Tichishandisa hunyanzvi hwaMwari. Shoko reRuponeso riri kusvika kumunhu wose. Riri kukurumbira. Nyika dzavhurika. Goho rawanda. Saka Mwari vari kuwana mbiri yose.

Namata Uchiti
Baba vandinoda. Ndinokutendai. Mweya Mutsvene vava kugara mandiri. Vanoita kuti ndigone kukushumirai nomazvo. Vanoita kuti ndigone kurarama nomazvo. Ndava nesimba guru. Ndava kushandisa mazano aMwari pakurarama kwangu. Ndava kutonga zvinhu zvenyika ino. Ndichiita mabasa anoita kuti mukudzwe saMwari. Ndichiunza vakawanda munyika yenyu. Muzita raJesu. Ameni.

Dzimwe Ndima Dzinotsigira Chidzidzo ChaNhasi
Mabasa 2 ndima 14 kusvika 22, 37 kusvika 41
Mabasa 1 ndima 8