Izwi RaMwari Rinoita Kuti Ukure

Muvhuro, 6 Chivabvu 2024

*Tiri kuda kugumisa zvinofundiswa izvi kuvanhu veshe, pashi reshe.* Chipo chako kudetsera pamushando uyu. Unokona kuchituma neEcoCash pa: *151*2*6*58225# Mwari vakufumisei

“Kudai ngevana vatsva vachaamba kuberekwa, disisai mukaka woMweya usina kuchengedzera, kuti mukure ndiwo, muponeswe” (1 Petro 2 ndima 2).

Isusu taa munaKristu. Ndizvo taa nezveshe zvetinosisira kua nazvo. 2 Petro 1 ndima 3 inoti, “Simba rake rouMwari rakatipa zveshe zvinotamika mukupona uku, nomukudira kubudikidza ngokuzia uwo wakatidaidza ngouthende hwake nokunaka”. Mwari vane zviro zvevakatipa. Zviro zvakhona ngezviya zvetinosisira kua nazvo munyika muno. Nezveshe zvetinosisira kua nazvo mumweya. Vakashandisa simba ravo kutipa zviro izvi. Asi iwewe unosisira kuzwisisa Mwari ava. Ndikwo kuti ukone kushandisa zviro zveshe izvi.

Mwari vane nyika yevanotonga. Nyika iyi iri mumweya. Isusu taa zvibarirwe zvomunyika iyi. Ndizvo tinosisira kuzwisisa nyika iyi. Tinosisirawo kukura munaMambo. Apa tinenge tiri kutodzidzawo kushandisa pfuma yedu. Yona pfuma iya yevakatipa. Izvi zvinotodzana nokurera vana. Vana ava vanenge vari varidzi vepfuma yevabereki vavo. Asi avabvi vatopuwa pfuma iyi yeshe. Vanosisira kutanga vakura. Kana vabva zera, ndipo pevanozopuwa pfuma iyi. Izvi ndizvo zvinoitikawo mumweya.

Bhaibheri rinoronza muna vaGaratia 4 ndima 1 reiti, “Inini ndinoronza izvi kuti mudyi wenhaka mukuwo weshe waachiri ndumure, aana chaanopinda ndicho muranda, kunyazwi ndiye mambo wazvo zveshe”. Mwana uyu unokona kunge akapuwa pfuma. Kana kuti echisisira kuzotonga. Asi unosisira kutanga akura. Ndikwo kuti azokona kushandisa pfuma iyi. Zvisirizvo unenge akangotodzanawo nevamweni varanda veshe. Ngenyi izvi zvakakosha?

Mundima iyi mune izwi rinoti “mwana”. Izwi iri rinoturikirwa kubva kuizwi reChigiriki. Izwi reChigiriki rakhona rinoti, “nepios”. Aringoronzi mwana pakubarwa. Rinoronzawo mwana pamipinimidzo. Rinoronzawo munhu unoereketa semwana mudoodori. Ndizvo Mukristu unokona kunge ari mwana mumweya. Mukristu uyu unenge akapuwa zvifumiso. Unenge akapuwa pfuma. Asi unenge asati aa kukona kuereketa ngomwazvo. Saka aakoni kurya pfuma iyi.

Mazwi ounoronza akakosha. Ndiwo ounoshandisa kutora pfuma iyi. Ndizvo unosisira kugara uchiereketa. Uchiereketa somunhu anowirirana nezvakaronzwa ndiMwari padera pako. Usikaronzi zvounoona ngemadziso. Asi kune vasikaereketi ngenjira yakadaro. Makristu aya vanenge vachiri vadoodori. Makristu aya vanoereketa zvevanoona ngemadziso. Ngokudaro zvinenge zviri pamhene kuti avazi kupangwa. Ndiyo ndaa vechisisira kupuwa vanovangwarira. Vangwariri ava vanenge vechisisira kumbovapanga. Vechivapanga mhera vaaruka. Izvi ndizvo zvetinoziiswa muna vaGaratia 4 ndima 2.

Ndiyo ndaa techisisira kugara teikura. Tinokura kudaro ngokushandisa Izwi raMwari. Ndiyo ndaa uchisisira kunge uri nhengo yeChiara cheVakacheneswa. MuChiara umwu ndimwo mwounofundiswa Izwi raMwari. Uchipangwa ngeIzwi iri. Uchizopedzesera wakura. Waa kukona kuereketa ngomwazvo.

Kumbira Weiti
Baba vomudenga vendinoda. Ndinomubonga. Mune pfuma yemwakandipa. Pfuma iyi iri munaKristu. Mwakandipawo Izwi renyu. Izwi iri ndiro rendinoshandisa pakupona kwangu. Ndinotenda kurerwa ngeIzwi renyu. Pamwepo nokutungamirirwa ngeIzwi iri. Ndizvo ndinowana nyasha dzakawanda. Zvechiita kuti ndibudirire zvinoshamisa. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
VaGaratia 4 ndima 1 kusvika 2
2 Petro 3 ndima 18
Vahebheru 5 ndima 12 kusvika 14

(Zvetafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Mungoriwona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church