Kupona Kwako Chinyuka CheMvura Inopona

Chitatu, 29 Gumiguru 2025

*Tiri kuda kugumisa zvinofundiswa izvi kuvanhu veshe, pashi reshe.* Chipo chako chinokona kudetsera pamushando uyu. Unokona kuchitumira ngeEcoCash pa:: *151*2*6*58225# Mwari vakufumise

Uwo unotenda kwendiri, kudai ngokuronza kwezvinyorwa, ndwizi dzemvura yokupona dzinozopopoma kubva mwaari (Johani 7 ndima 38).

Iwewe ungaa Mumwari. Kupona kwako kunosisira kua chinyuka. Chinyuka chakhona chinosisira kubuda mvura inopona. Mwari ndivo vakaronga kudaro. Asi kune vamweni vasiri zvinyuka. Vanhu ava vanogara vechikumbira zviro kuna Mwari. Vanovakumbira kudaro peshe pevanoshongana. Ndizvo kupona kwavo madziya. Vanongozia zvekukumbira Mwari zviro. Vechingoereketa matambudziko avo. Izvi azvisirizvo zvevanosisira kuita.

Isusu tingashongana. Tingaa tiri kukumbira. Nokuti kudira Mwari. Nokuti kufunda Zvinyorwa. Tingaa hedu varongomuna. Nokuti vashanu. Nokuti vatanhatu. Kana kupinda. Tinosisira kuereketa Izwi raMwari. Izvozvo ndizvo zvinoita zvinyuka. Mambo Jesu vakati, Uwo unotenda kwendiri, kudai ngokuronza kwezvinyorwa, ndwizi dzemvura yokupona dzinozopopoma kubva mwaari. Izvi ndizvo zvetaerenga muna Johani yechinomwe ndima yemakumi matatu nechisere.

Ndwizi dzemvura inopona idzi mazwi. Isusu tisu tinenge tiri kuronza mazwi aya. Mazwi akhona ngeeMweya Wakachena. Mazwi aya ane simba. Anounza zvifumiso. Mazwi akadaro ndiwo anonasirisa zviro zvokupona kwako. Karakadza zvakamboereketwa ndiMwari. Pona paya pevaiya vari kuereketa kuna Ezekieri. Tinowana mashoko acho muna Ezekieri yemakumi matatu nechinomwe ndima yechirongomuna kuguma yechishanu. Inoti, Profeta kuneaya magodo wechiti kwaari, O magodo akaoma, izwai izwi raMambo Mwari; Izvi ndizvo zvinoronza Mambo Mwari, Mwari kuneaya magodo, Ringira, ndinozoita kuti mweya wokufema upotere mukati mwenyu, nemwi munozorarama.

Ndizvo ereketa Izwi raMwari. Uronge wega kupona kwako. Usaemera kuti umweni munhu akurongere. Rekera mvura ibude mwouri. Ronza mazwi aMweya. Uchiereketa ngepadera peremangwani rako. Uchiereketa ngepadera peshumiro yako. Pemishando yako. Peutano hwako. Uchiereketa kumuiri wako. Kumagodo ako. Kuganda rako. Nekungazi yako.

Usarekera nyika ichironga zvichaitika kwouri. Ronza mazwi eMweya Wakachena. Ronza zviri mumweya. Ungaa uri kuda kuti Mwari vapindire mukupona kwako. Dzimweni nguwa unenge uchisisira kuronza mazwi aMweya Wakachena. Ndikwo kuti vapindire kudaro. Mwari vane zvevakakupa. Vakakupa Izwi ravo. Vakakupa Mweya Wakachena. Vakakupawo muromo. Shandisa zviro izvi. Zvishandise kuronza mazwi aMweya Wakachena. Mazwi aya ngaabude mwouri akawanda. Ngaabude ari mazwi anoraramisa zviro. Ane simba. Anoporesa. Anofumisa. Ngaabude kubva mukati mwako. Hareruya.

Kumbira Weiti
Baba vendinoda. Ndinomubonga. Mwakandiita chinyuka chemvura inopona. Ndwizi dzinoerera kubva mundani yangu. Idzo ndwizi dzemvura inopona. Ndwizi idzi mazwi endinoronza. Iwo mazwi anoraramisa zviro. Anoporesa. Anofumisa. Ndinogara ndiri mutano. Ndine simba. Ndinobudirira pane zvendinoita. Ndakapfuma. Muzina raJesu. Ameni.

Dzimweni Ndima Dzinotsinhira Kufunda KwaNyamashi:

Zvirevo 18 ndima 4
Johane 7 ndima 38 AMPC
Joere 2 ndima 28

(Chidzidzo ichi chatorwa kubva mu:
Rhapsody of Realities (Ndau)
Rinonyorwa na:
Mufudzi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa: https://bit.ly/Shona_Church