Enda Kune Vanogamuchira Shoko Rako

Chitatu, 6 Nyamavhuvhu 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

Ini ndobvunza. Ndichiti, Vaisiraeri vakagumburwa kuti vaparare here? Kwete! Asi kuwa kwavo uku. Ndiko kwakaita kuti vanhu vasiri Vajudha vaponeswe. Zvichibva zvaita kuti ivo vaite godo (Varoma 11 ndima 11).

Iwe ungava uri kuparidzira vanhu. Panozoita vamwe vasingadi kuti uvaparidzire. Vachiramba kukokwa kuminamato. Asi iwe haufaniri kuvodzwa moyo naizvozvo. Ibva wangoenda kune vamwe. Enda kune vaya vanenge vari kugamuchira shoko rako.

Izvi ndizvo zvakaitwavo naMwari. Ivo vakatuma Jesu. Vakavatuma kuVajudha. Vajudha ava ndivo vakanga vachitova vanhu vaMwari. Saka Jesu vakanga vazvarirwa pakati paVajudha ava. Jesu vakanga vauya kuzozivisa Vajudha ava pamusoro penyika yaMwari. Asi Vajudha ava havana kugamuchira shoko iri. Johane yekutanga ndima yegumi neyekutanga inoti, Rakauya kuvanhu varo. Asi vanhu ava havana kurigamuchira.

Saka Jesu vakazoita sei? Vakabva vaenda kuvanhu vasiri Vajudha. Vanhu ava ndivo vakazogamuchira shoko ravo iri. Mwari ngavarumbidzwe. Izvi ndizvo zvakaitikavo kuna Pauro. Iye akanga ambotambudza vakanga vagamuchira Muponesi Jesu. Akanga ambotsvaka kuti shoko reRuponeso risaparidzwa. Asi akazopa moyo wake kuna Ishe. Akabva atanga kuparidzira Vajudha. Asi vakawanda vavo havana kumuteerera.

Pauro uyu akanga achimbova mumwe wavo. Asi apa vakanga vava kumuramba. Vaimuramba nokuti akanga ava Mumwari. Pauro akabva asiyana navo. Akabva aenda kuvanhu vakanga vasiri Vajudha. Vanhu ava ndivo vaakanga agara atumwa kwavari naMwari. Izvi ndizvo zvatinovona muna Mabasa yemakumi maviri netanhatu ndima yegumi netanhatu kusvika gumi nesere.

Mabasa yegumi nenhatu inotitauriravo pamusoro paPauro. Apa Pauro akanga aina Bhanabhasi. Vaviri ava vakanga vari kuparidza. Vaiparidza muAndioki. Iyi iAndioki iri mudunhu rePisidhiya. Vaviri ava vakambogamuchirwa havo. Vakaparidza muimba yeVajudha yekunamatira. Asi vatungamiriri veVajudha vakazovaitira godo. Vakabva vatanga kuvarwisa. Vana Pauro vakazotaura kuvatungamiriri ava. Tinoverenga mashoko avo muna Mabasa yegumi nenhatu ndima yemakumi mana netanhatu. Inoti, Shoko raMwari raifanira kutanga rataurwa kwamuri. Ndizvo zvakanga zvakafanira. Asi mariramba. Mukaita kuti musakodzera hupenyu husingaperi. Isu tava kukusiyai makadero. Toenda hedu kuvanhu vasiri Vajudha.

Saka pangaita hapo vanhu vanoramba kugamuchira shoko rako. Vanhu ava havafaniri kubva vatokanganisa mweya wako. Havafaniri kukuvodza moyo. Vanyengeterere hako. Asi usavora moyo. Ramba uchiparidzira vamwe shoko reRuponeso.

Pachava nevaunobudirira kutendeusa. Vakakuramba vaya vanozovona izvi. Vozopedzisiravo vagamuchira shoko rako. Izvi ndizvo zvichaitavo Vajudha. Bhaibheri rinoti vachavona vanhu vasiri Vajudha vachitendeuka. Vozopedzisira vagamuchiravo Muponesi Jesu. Saka ramba uchishingaira. Uchiparidzira vanhu Ruponeso. Uchivimba nesimba reshoko reRuponeso iri.

Pupura Uchiti
Ndinogara meso angu ari pabasa ramakandipa. Saka ndinoramba ndichisvitsa shoko reRuponeso kuvanhu. Ndichiziva kuti shoko iri rinotova simba raMwari. Ndiro simba ravanoshandisa kuponesa vanhu. Vanoponeswa vacho vari ivo vaya vanenge varigamuchira. Ini ndinoita kuti vakawanda varuramiswe. Ndinoita kuti moyo yavo itendeusirwe kwamuri. Ndinoita izvi ndichibatsirwa nenyasha dzenyu. Ndichibatsirwavo nesimba raMweya Mutsvene. Saka ndiri chiedza chenyika pachokwadi. Hareruya!

Dzimwe Ndima Dzinotsigira Chidzidzo ChaNhasi
Mabasa 13 ndima 45 kusvika 46
Matiyo 10 ndima 5 kusvika 15 NIV

(Chidzidzo ichi chatorwa kubva mu:
Rhapsody of Realities (Shona)
Rinonyorwa na:
Mufudzi Chris Oyakhilome DSc DD.
Munoriwana pa: https://url.za.m.mimecastprotect.com/s/Wx2jClOkvrH2ExwcGf3iz0Tr3?domain=rhapsodylanguages.tniglobal.org/
Zvimwe zvidzidzo munozviwana pa: https://url.za.m.mimecastprotect.com/s/pm_ZCmw02vcjlzofOhAiRIW3o?domain=bit.ly