Usangovona Mhomho YeVanhu

Muvhuro, 24 Mbudzi 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

Hushe hwekudenga hwakafanana nemutengi. Uyu mutengi aitsvaka matombo anodhura. Ane dombo raakawana. Dombo racho rakanga richidhura chaizvo. Akabva anotengesa fuma yake yose. Akadzoka, akatenga dombo iri (Matiyo 13 ndima 45 kusvika 46).

Mwari vanokoshesa munhu mumwe nemumwe ari panyika pano. Newevo unofanira kukoshesa vanhu ava. Ishe Jesu vane mashoko avakataura. Tinoaverenga muna Johane yegumi nesere ndima yepfumbamwe. Vakati, Mune vanhu vamakanga mandipa. Hapana mumwe wavo wandakarasikirwa naye. Mwari vane vanhu vavakanga vapa kuna Ishe Jesu. Jesu vakagona kuchengeta vanhu ava. Havana wavakarasikirwa naye. Mumwe chete ndiye akarasika. Asi uyu akanga atogara arongerwa kuparara. Saka isu tingatendeusira vanhu kuna Mwari. Tinofanira kubva tatevedzera zvaiitwa naIshe Jesu.

Tingaita vanhu vanouya kumasangano edu. Vanhu ava vangava vakawanda. Hatifaniri kungovona vanhu ava semhomho. Tinofanira kuziva mumwe nemumwe wavo. Masangano akawanda anotanga zvakanaka. Ozopedzisira arasikirwa nenhengo dzawo. Mamwe anotanga nedzimwe nhengo. Ozopedzisira ava nedzimwe nhengo. Ko, nhengo dzakatanga sangano iri dziripi? Nhengo idzi dzinenge dzakaiswa mumavoko edu. Tinofanira kudzichengeta.

Vanhu havafaniri kuuya vachienda. Vanofanira kugara mumasangano edu. Kungazoita vatsva vanouya. Vanhu ava vanofanira kuwedzera pane varipo. Havafaniri kunge vari kutsiva vakaenda. Zvisizvo masangano edu haazombokuri. Hatimbozosviki pakuzadza nzvimbo dzatinonamatira.

Munhu mumwe nemumwe akakosha. Anofanira kurerwa. Agova nhengo yemhuri yaMwari yakazara. Anofanira kuva nhengo yesangano reVatsvene. Musangano umu ndimo munowanikwa chokwadi chose. Ndimo matinogona kuchidzidza. Ndiko kusaka tiine masangano madoko. Iwe ungava mufudzi wesangano. Sangano rako rinofanira kuva nemasangano madoko. Iwe ndiwe unofanira kutoronga masangano madoko aya. Ndiwe unofanira kuvona kuti ari kushanda zvakanaka.

Unofanira kuziva kwaanopindira. Pota uchimashanyira. Taura nevanoatungamirira. Uchinzwa kuti ari kufamba zvakanaka here. Iva neshungu dzekuziva nhengo imwe neimwe yesangano rako. Usangovavona seboka rimwe chete. Ziva mumwe nemumwe wavo. Gara uchitaura nevanotungamirira masangano madoko. Iwayo anosangana mudzimba. Tsvaka kuti vatungamiriri ava vashande nomazvo. Tsvaka kuziva mashandiro avanoita nenhengo dzesangano. Ziva vanhu vako. Vanyengeterere. Pota uchitaura navo. Uchivabatsira kuti vakure.

Haungofaniri kuparidza paminamato chete. Taura nenhengo dzesangano rako. Zivana navo. Vafudze. Vachengete. Ishe ndivo vakavaunza kusangano rako. Saka vanovakoshesa. Pinda muhupenyu hwavo. Zvisizvo hauzogoni kuvabatsira. Masangano haangokuri. Iwe ndiwe unoronga kuti sangano rako rikure. Unofanira kuronga kushanda. Munhu mumwe nemumwe akakosha. Tinofanira kuita zvose zvinodiwa kuti asarasika.

Namata Uchiti
Baba vandinoda. Ndinozvipira kufudza Vatsvene. Ndichiita kuti mweya yavo ikure. Ndinotaura navo. Ndichivakurudzira. Ndichitendeusira vanhu kuna Mwari. Mwari vane vanhu vavakaisa mumavoko angu. Ndinorera mumwe nemumwe wavo. Ndichiita kuti asimbe. Mweya wake ukure. Ave mushandi mugoho renyu. Muzita raJesu. Ameni.

Dzimwe Ndima Dzinotsigira Chidzidzo ChaNhasi
Johane 6 ndima 39
Mabasa 20 ndima 28
Ruka 15 ndima 4 kusvika 7
Johane 17 ndima 11 kusvika 12

(Chidzidzo ichi chatorwa kubva mu:
Rhapsody of Realities (Shona)
Rinonyorwa na:
Mufudzi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa ndima https ndima //bit.ly/Shona_Church