Kutsanya Kwakakosha

Mugubera, 26 Chikunguru 2025

*Tiri kuda kugumisa zvinofundiswa izvi kuvanhu veshe, pashi reshe.* Chipo chako chinokona kudetsera pamushando uyu. Unokona kuchitumira ngeEcoCash pa:: *151*2*6*58225# Mwari vakufumise


Zvino ndaringirisa hope yangu kwaari Mambo Mwari, Mwari, kutsvaka mupinguro ngokukumbira nokupota, pamwepo nokuera kudya (Dhanieri 9 ndima 3).

Bhaibheri rine vanhu verinoronza ngezvavo. Ava vanhu vakasitsanya. Vechikumbira usiku nemasikati. Iyi ndiyo yaiya iri njira yevaishumira Mwari ndiyo. Isusu tinosisira kuteedzera kukumbira kwevanhu vakadaro. Tinosisirawo kuita zvevakaita izvi. Tinoona umweni wavo muna Ruka yechipiri ndima yemakumi matatu nechitanhatu kuguma makumi matatu nechinomwe. Uyu waiya ari Ana. Waiya ari muprofeti. Waiya aa kutogara ari mumhatso yaMwari. Ndima yakhona inoti, Kwaiyapozve Ana muprofeti womukadzi, mwanasikana waFanueri wedzinza raAsha. Waiya aamusharuka, iye waiya akagara nemwamuna wake makore manomwe sure kwousikana hwake. 37Naye wakaita shirikadzi makore makumi masere namarongomuna. Aazi kutongobuda kubva muTemperi, echidira nokuera kudya nokukumbira usiku nemasikati.

Tinoerengawo ngepadera paPhauri. Apa waiya ana Bhanabhasi. Pamwepo nevamweni vatungamiriri. Nhoroondo yavo tinoiona muna Zvakaitwa yegumi nechitatu. Vanhu ava vakazvipira kutsanya. Vechikumbira. Izvi ndizvo zvetinoona muna Zvakaitwa yegumi nechitatu ndima yokutanga kuguma yechitatu. Inoti, Zvino muAntiokhi muchiara chaiya chiripo mwaiya nevaprofeti nevadzidzisi: Bhanabhasi, Simeoni uwo waizwi ndiNiga, Rusiasi weKurene, Manaene uwo wakakura pamwepo naHerodhi sadunhu, naSauri. Vachadira Mambo, vechiera kudya, Mweya Wakachena wakati, Paradzanisai kwendiri Bhanabhasi naSauri kuti vaite mushando wendakavadaidzira. Apo vaera kudya nokukumbira, vakaisa nyara dzavo padera pavo, vakavaendesa..

Zvakaitwa yegumi nechirongomuna ndima yamakumi mairi nechitatu inoronzawo ngepadera paPhauri. Apa waiya ana Bhanabhasi. Vairi ava vakarambawo vari patsika yokutsanya iyi. Zvinozwi, Naapo vaiya vagadza vakuru muchiara chimwe ngachimwe, vakakumbira nokuera kudya, vakavapira kunaMambo uwo wevakatenda kwaari. Phauri une paakazombopa nhoroondo yekupona kwake. Tinoerenga nhoroondo yakhona muna 2 vaKhorinte yegumi neimwe. Wakaronza apa ngezvekutsanya kwake. Ndima yemakumi mairi nechinomwe yakhona inoti, Mukushanda nomukurwadziwa, mukusikaata kazhinji, mukupera ngenzara nenyota, mukuera kudya kazhinji, mukutonhorwa nomukuita mutitinini.

Mambo pachezvavo vaitsanyawo. Tinoona izvi muna Mateu yechirongomuna ndima yechipiri. Inoti, Wakati aera kudya mazuva makumi marongomuna masikati nousiku waiya nenzara. Apa Jesu vaiya vaa kuda kutanga shumiro yavo. Saka vaiya vari kunasirira mweya wavo.

Saka kutsanya kwakakosha. Izvi ndizvo zvetinoona mundima idzi. Vanhu veshe ava vane mushando wevaiya vapuwa. Mushando uyu ndiwo wetakapuwawo isusu. Ndizvo tinosisira kutsanya peshe pakasisira. Ndikwo kuti tikone kushanda nemweya wevakashanda nawo ivo. Kutsanya kunoita kuti mweya yedu igare yakamuka. Techikona kutungamirirwa ndiMwari. Techikona kuita mushando wevakaisa munyara dzedu. Mwari ngavakudzwe saMwari.

Kumbira Weiti
Baba vendinoda. Ndinomubonga. Izwi renyu rinondionesa zvokuita. Rinondipa vanhu vokuteedzera. Inini ndinoteedzera vanhu ava. Ndinogonda ndimwi sezvavakaita. Ndinopona ngemipango yenyu. Ndechikudirai ngomwoyo weshe. Ndechikushandirai nokukumbira nokutsanya. Ndechishingaira kuita mishando yemwakandipa. Ndinomubonga. Izwi renyu rinondipa tsika yakanaka. Tsika iyi ndiyo inotungamirira kupona kwangu. Zvechiita kuti ndigare ndechinyisa. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
Nehemia 1:4 NKJV
Mabasa Avapostora (Mabasa) 13:1-3 NIV
Ruka 2:36-37 NKJV

(Zvafundiswa izvi zvatorwa kubva mu:

Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church