Chiinyi Chinodiwa Kuti Uve Nyanzvi?

Soto, 15 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Ngokukasira Dhanieri uyu wakaremeredzwa kupinda nduna huru nenduna doko, ngokuti mweya wakanakisisa waiya mukati mwake, namambo wakapinimidza kumuemesa padera poumambo hweshe" (Dhanieri 6 ndima 3).

Ndaiya ndichiri chikomana chidoko. Asi ndakaronzera dzimweni shamwari dzangu ndechiti, "Inini andisiri kuzomboita murombo mhera nariini". Shamwari dzangu idzi dzakasheka. Dzikati, "Mazwi akadaro aaronzwi. Zvichaitika mukupona unozvizia ere iwewe?" Inini ndakavadaira. Asi ndakavadaira ngenjira yevaisafungira. Ndakavati, "Handisiri kuzoita murombo ngokuti ndine mishando yendinokona kuita. Ndinokona kuchenesa bhutsu. Uyezve ndinokona kusuka motokari". Panguwa iyi ndaisichenesa bhutsu dzababa angu. Uye ndaigeza motokari dzavo. Baba angu vaiya vandidzidzisa kuita mishando iyi. Saka ndaiikona yaamho.

Ndaiya ndichiri mudoko hangu. Asi ndaigara ndichizvifundisa mishando yemaoko. Ndaiya neshungu dzokua nyanzvi pamishando yangu yeshe. Munhu ungaa hake nemishando yaanokona kuita. Asi izvozvo azvimuiti nyanzvi pamishando iyi. Shungu ndidzo dzinodiwa. Bhaibheri rinoronza ngepadera paDhanieri. Dhanieri uyu aia nemweya wakanakisisa. Izvi ndizvo zvakaita kuti mambo vaise umambo hwavo hweshe munyara dzake. Unyanzvi hunokumirudzira.

Iwewe ungaa nezviro zvounoita. Usangoita masiyandaita. Zviite nounyanzvi. Iva neshungu dzokuita zviro ngomwazvo. Fundira mishando yakasiyana siyana. Erenga. Tutsira kuzia. Unyanzvi hunoda shungu. Hunoda kushanda ngesimba. Uchipfekawo somunhu ane runako rwaKristu. Waa mambo. Baba ako ndivo Mambo. Ndizvo simira zvakachena. Ereketa somunhu anozwisisa zviro. Hamba somunhu akakodzera kuremeredzwa. Usanonoka kumushando. Usanonokera vanhu. Guma ngenguwa. Ronga mishando yako zvakanaka. Uchitsvaka kuipedza ngenguwa.

Mwari avangomuki vechikugadza umambo. Vanotanga vakufundisa. Vane zviro zvevanotanga vakurovedzera. Saka ungashongana nezviro pakupona. Zviro izvozvo zvinenge zviri kutokututsira unyanzvi. Saka unosisira kuzvinyisa. Ndikwo kuti umirudzirwe. Ungaa mutungamiriri. Fundira hutungamiriri uhwohwo. Ungaa mufundisi wechiara chidoko. Fundira mushando uyu. Ukone kudetsera vanhu. Gara uchitsanduka. Uchitutsira kunaka. Uchivandudzika.

Ungaa unoita zvemitambo. Iva nyanzvi pamutambo wako uyu. Chikwata chako achisisiri kuda kukutama. Nyanzvi inodiwa ngomunhu weshe. Apana anoda kuti itorwe ngevamweni. Iwewe ivawo nyanzvi. Ita zviro zvako ngomwazvo. Zviite ngeshungu. Vanhu vakaona mishando yako, vanosisira kubva vakudza Mwari saMwari.

Kumbira Weiti
Baba vendinoda. Ndinomubonga. Mweya wakambaanaka uri kushanda mwendiri. Ndinotsamwirira pamishando yangu. Ndakazvipira kugara ndechizvivandudza. Mipinimidzo yangu yakamuka. Inopinimidza zviro zvinodetsera. Ndinonasirisa zvinonesa. Ndinoshandisa mazano aMwari pakupona kwangu. Ndinogara ndechiita zvinodetsera vanhu. Ndinobudirira pane zveshe zvendinoita. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
Mazwi Akangwara 22 ndima 29
VaFiripi 3 ndima 13 kuguma 14
VaKhorose 3 ndima 23

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church