Fundira Kurarama Kupona KweDzinza Rako

Muvhuro, 23 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Asi kudya kwakagwinya ngokwevakuru, ngokuti avo mipinimidzo yavo yakadzidziswa ngokuita kutsanangura zvakanaka kubva panezvakashata" (VaHebheru 5 ndima 14).

Une pewaiya uchiri mwana mudoko. Auzi kungotanga ngokuhamba apa. Magodo ako aiya asati agwinya. Nyama dzako dzaiya dzisati dzagwinya. Apana waikona kupinimidza kuti ungaema ngemirenje yako. Mirenje iyi yaiya ichiri midokosa. Asi wakazokura. Ukatutsira kugwinya. Vabereki vako vakazotanga kukufundisa kugara. Apazi kupera nguwa yakareba. Wakabva watokona kugara wega.

Wakabva watanga kutamanda. Ukazokona kuema wega. Ukachifundira kuhamba. Wakatanga uchimbodonha hako. Asi waingomirudzwa. Uchizwizve uhambe. Nyamashi waa kukona kuhamba. Unotohamba usikaringiri pounotsika. Usikatofungi kuti ungadonha.

Izvi ndizvo zvinoitikawo pamweya. Ndizvo usaereketa uchiti, "Andifungi kuti ndiri mwana waMwari wemene inini. Ngenyi zvimweni zviro zvangu zvisikahambi zvakanaka?" Iwewe uri mwana waMwari. Izvozvo azvina angaphikhisa. Mweya Wakachena vanotopupurira mweya wako izvozvo. Izvi ndizvo zvetinoziiswa muna vaRoma yechisere ndima yegumi nechitanhatu. Waa kungosisira kufundira kurarama kupona kweVamwari zvega.

Unosisira kufundiswa kupona kwokururama. Unosisira kujaira kushandisa Izwi raMwari. Fundira kurishandisa pakupona kwako. Kupona kweVamwari ngokwekutofundira. Isusu tiri Izwi raMwari. Tinosisira kufundira kupona seIzwi raMwari. Ndizvo zvijaidze kudakarira vanhu. Zvijaidze kugonda ndiMwari. Zvijaidze kushandisa masimba eVamwari. Zvijaidze kugara wakadakara. Zvijaidze kupona mukunyarara. Zvijaidze kunyisa zviro zvomunyika muno. Unozogumisira usisatamburiri kurarama kupona kweVamwari uku.

Kuzvijaidza uku ndikwo kua Izwi raMwari. Ndikwo kwetinoona muna Jakobe yokutanga ndima yemakumi mairi nemairi kuguma makumi mairi nechishanu. Inoti, "Asi itai vaiti veizwi, haiwa vanozwa kwega mwechidzichengedzera. Ngokuti kudai munhu ari muzwi weizwi, asiri muiti waro, uyu wakadai ngomunhu unoringira hope yake yechibarirwe muchiboniboni; ngokuti unodziona pachake, orooenda, paripo unoriyarwa chiemo chaanacho kuti chakaitawani. Asi uwo unoringira mupango wakaperera wokusunhurika, echiangira kudaro, asikaiti unozwa echiriyarwa, asi muiti womushando, uyu munhu unozofumiswa muzviito zvake".

Ndizvo ramba uchifundira kupona kweVamwari. Ramba uchifundira kushandisa Izwi raMwari pakupona kwako. Ramba uchifundira kurarama kupona kwedzinza rako. Unozogumisira waa kunyisa zveshe zvounoshongana nazvo. Unozogumisira wapfuma. Waa mutano. Waa kukona kushandisa mazano aMwari. Zvinenge zvisikachakunesi kurarama kupona kweVamwari uku. Mwari ngavakudzwe saMwari!

Kumbira Weiti
Baba vendinoda. Ndinomubonga. Muri kushandisa Izwi renyu kundifundisa kurarama kupona kwokururama. Muri kushandisawo Mweya Wakachena kundifundisa kudaro. Ndinopona muIzwi renyu. Ndechipona kudaro somunhu wenyika yenyu. Izwi renyu ndiro rendaa kushandisa pakupona kwangu. Ndizvo simba rangu rekugonda ndimwi rinotutsira. Ndinotutsira kuzwisisa zviro zvomweya. Ndechinyisa zviro zveshe zvendinoshongana nazvo. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
1 Thimothi 4 ndima 7 kuguma 8
VaFiripi 4 ndima 9
Jakobe 1 ndima 22

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church