Ukashingaira Unopunduka

Chishanu, 4 Kubvumbi 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

Kushanda nesimba kwose kunopa mubayiro, asi kungotaura kunotungamirira kuurombo bedzi (Zvirevo 14:23).

Ndima yatavhura nayo inotaura nezvekushingaira. Uku kunenge kuri kushanda nesimba. Kunenge kuri kungwarira mabasa ako. Ndima iyi inoti kushingaira uku kunosiyana nekungotaura. Simbe ndidzo dzinongowanza kutaura. Inoti munhu anotaura kudai anopedzisira ava murombo.

Asi kune vanoshanda nesimba. Hazvigoni kuti vanhu vakadai vave varombo. Kushanda kwavo kunovapundusa. Asi kune vaya vanongowanza kutaura. Vanhu ava ndivo vanongoshoropodza zvose zvose. Vanotaura sezvinonzi vanoziva chaizvo. Vanozviidza vanoziva kudarika hurumende. Vanozviidza vanoziva kudarika vatungamiriri venyika. Hapana kana chimwe chavanoti havazivi. Asi ivo pachavo havana chine musoro chavanoita.

Bhaibheri rinotaura pamusoro pevanhu vakadai. Rinoti vanhu ava vanopedzisira vava varombo. Vanhu ava vangaita havo sevanoziva zvakawanda. Asi vanenge vari kungotaura chete. Ndiko kusaka Shoko raMwari richisimbisa kushanda nesimba. Richiyambira vanongowanza mashoko ava. Zvirevo yegumi ndima yena kusvika yeshanu inoti, Maoko ane usimbe anoita kuti munhu ave murombo, asi maoko anoshingaira anopfumisa. Anounganidza zvirimwa muzhizha, mwanakomana akachenjera, asi anorara munguva yokukohwa, mwanakomana anonyadzisa.

Zvirevo 12 ndima 24 inosimbisa izvi. Inoti, Maoko anoshingaira achatonga, asi usimbe hunopedzisira mukushanda somuranda. Mwari vanoda kuti ushande nesimba. Vanoda kuti ushingaire pamabasa ako. Havadi kuti ungowana kurarama chete. Asi kuti ufume. Vanoda kuti ubudirire pane zvose zvaunoita. Izvi ndizvo zvatinovona muna 3 Johane 1 ndima 2. Inoti, Hama yangu. Ndinoshuva kuti ubudirire. Budirira sekubudirira kuri kuita mweya wako. Uye uve nehutano hwakanaka. Ndizvo zvandinokushuvira kudarika zvimwe zvose.

Izvi ndizvo zvaunoshuvirwa naMwari. Vanoda kuti ufume. Vanoda kuti zvaunoita zvose zvibudirire. Zvingava zvinhu zvaunoita mumweya. Zvingava zvinhu zvaunobata nemavoko ako. Zvose zvinofanira kubudirira. Saka shingaira pamabasa ako. Shingaira pamabasa awakapiwa naMwari. Mwari vakaronga kuti ufume. Saka zvivone semufumi. Shandisa mazano avo pakurarama kwako. Mwari vanokufarira. Saka vanoda kuti ufume. Nokudero vanokuropafadza. Vachiita kuti uve nefuma yakawanda. Isingaperi. Mwari ngavarumbidzwe!

Namata Uchiti
Baba vandinoda. Ndinokutendai. Shoko renyu rinondipa mazano. Mazano aya anondifumisa. Ndinoshingaira pamabasa angu. Nokudero mabasa angu akaropafadzwa. Ndiri kubudirira pane zvose zvandinoita. Ndinobudirira kudai sekubudirira kunoita mweya wanguvo. Fuma yangu haiperi. Ndinogara ndiine zvakawandisa. Muzita raJesu. Ameni.

Dzimwe Ndima Dzinotsigira Chidzidzo ChaNhasi
Zvirevo 12:24
Muparidzi 9:10
Mapisarema 1:3


(Chidzidzo ichi chatorwa kubva mu:
Rhapsody of Realities (Shona)
Rinonyorwa na:
Mufudzi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa: https://bit.ly/Shona_Church