Vakatora Ndaa Dzako Dzeshe

Soto, 8 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Nemwiwo karetu mwaiya vapara nemagaa mukupinimidza kwenyu, mwechiita mishando yakashata, zvino wakaiyanisa munyama yomuiri wake kubudikidza ngokufa, kuti amuise muri vakacheneswa nevasina ndaa, musikashooreki pamberi pake" (VaKhorose 1 ndima 21 kuguma 22).

Mambo vane nyasha dzakawanda. Vanotidakarira. Isusu tisu takashaisha. Asi vona vakatora zvishaishi izvozvo. Vakatsanangura kutorwa saivo vakazviita. Dangani une ndaa dzewakapara. Saka waiya uri kuzvidemba. Waiya usiri kusisira kuzvidemba kudaro. Mwari avachakuoni sewe wakapara ndaa idzi. Vaa kuona sedzakaparwa ndiMambo Jesu.

Ndizvo Mwari vakariarwa zvishaishi zvako zveshe. Zvingaa zvewakapara karetu. Kana zvouri kutopara izvozvi. Kana zvoungapara mangwani. Mwari avakarakadzi zvishaishi zveshe izvozvo. Zvakasara paMuchinjiko. Saka Sathani ungatsvaka hake kushambadza ndaa dzako. Vanhu vangada kukuona sewakashaisha. Newewo ungatozviona sewakashaisha. Asi izvozvo zveshe azvichina mushando. Apachina achakurangira zvishaishi izvi. Izvi ndizvo zvetinoziiswa ngeBhaibheri. Tinoerenga mazwi aro muna vaRoma yechisere ndima yokutanga. Inoti, "Ndizvo zvino akuchina kuitirwa ndaa kwavari vari munaKristu Jesu".

Vamweni vanhu vakashaisha vanobva vatokoniwa kuzvikungurira. Vanobva vazviona sevanhu vakashata yaamho. Iwewe ausisiri kuita izvi. Ashira Mambo Jesu. Ashira zvevakakuitira. Chirekera kuramba uchizviona soune ndaa. VaKhorose yokutanga ndima yemakumi mairi naimwe kuguma makumi mairi nemairi yati, "Nemwiwo karetu mwaiya vapara nemagaa mukupinimidza kwenyu, mwechiita mishando yakashata, zvino wakaiyanisa munyama yomuiri wake kubudikidza ngokufa, kuti amuise muri vakacheneswa nevasina ndaa, musikashooreki pamberi pake".

Ivo avazi kuti auna zvakashata zvewakaita. Vakangoti avazi kukushishirwa. Avasiri kuzokurangira zviro izvi. Iwewe waa wavo. Vakakuita munhu akarurama. Vakakutsandura dzinza. Vakakuita munhu wedzinza reVamwari. Wakatsanangurwa. Wakapembedzwa. Izvozvo ndizvo zvinoronza Vhangeri. Ndiro izwi revakatituma kooziisa vanhu. Mwari avachisiri kuerengera vanhu zvishaishi zvavo. Ndizvo zvetinosisira kuronzera vanhu izvozvo. Tsamba yechipiri kuna vaKhorinte chitsauko chechishanu ndima yegumi nechipfumbamwe inoti, "Ndikwo kuti, Mwari waiya munaKristu, echiiyanisa nyika kwaari, asikaerengeri kwavari kupauka kwavo, naye wakapa kwetiri izwi rokuiyanisa".

Mwari vakatobhadhara muripo waidiwa. Avachisiri kukuona somunhu une ndaa yaakapara. Munhu akaashira Jesu, munhu uyu unenge aa kukona kupona mukururama kwaMwari. Unenge aa kukona kupona mukunyarara kwaMwari. Unenge aa kukona kupona mukudakara kwaMwari. VaRoma yechishanu ndima yechisere kuguma yegumi inoti, "Asi Mwari unoonisa rudo rwake kwetiri ngokuti apo tichiri vashaishi Kristu wakatifira. ... Ngokuti kudai apo taiya magaa takaiyaniswa kunaMwari kubudikidza ngokufa kwoMukororo wake, kakurutu tiri vakaiyaniswa, tinozoponeswa ngendaramo yake". Hareruya!

Kumbira Weiti
Baba vendinoda. Ndinomubonga. Izwi renyu rinoronze gwinyiso. Mambo Jesu vakatora zvishaishi zvangu. Ndizvo ndinodakara yaamho. Andichazwi somunhu une ndaa yaakapara. Ndaa Mumwari. Andichina chishaishi. Imwimwi amuchandioni somushaishi. Ndaa kugara nemwi. Ndakapembedzwa. Ndakatsanangurwa. Ndaa Mumwari. Nyasha dzenyu dzakandisunhura. Ndizvo ndinodakara yaamho. Muzina raJesu. Ameni.

Dzimweni Ndima Dzinotsinhira Kufunda KwaNyamashi
Isaya 43:25; VaEfeso 1:7; VaHeberu 10:14

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church