Ndiwe Uripo Kunasirisa Zviro Zvakhona

Muvhuro, 9 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Nesu tinozia kuti zveshe zvinoshanda pamwepo kuita zvakanaka kwavari avo vanomuda Mwari, avo vakadaidzwa kudai ngokuemesa kwake" (VaRoma 8 ndima 28).

Apana dambudziko rinongoapo. Chinorinasirisa chakhona ndicho chinotanga chauya. Chinouya dambudziko rakhona risati raapo. Iwewe unosisira kukarakadza izvi. Matambudziko anongoinga vanokwanisa kuanasirisa. Izvi ndizvo zvendinogara ndechiziisa vanhu. Iwewe ungaa nesimba rekunasirisa dambudziko. Dambudziko rakhona rinobva rauya kwouri iwewe. Rinotouya rechikutsvaka. Ndiyo ndaa paine amweni matambudziko anongoinga iwewe wega. Indaa yokuti ndiwe une simba rokuanasirisa.

Ndizvo pangaa nematambudziko ewakamboshongana nawo. Mwari ndivo vakaronga kuti ushongane nawo. Vakaronga kuti uanyise. Masimba ako echizotutsirwawo. Ndizvo usatya matambudziko. Usatya miyedzo. Ndiyo inokumirudzira. Ichikututsira masimba. Izvi ndizvo zvetinoona muna Jakobe yokutanga ndima yechipiri. Inoti, "Hama dzangu, naapo mwogumirwa ngokuedzwa kwembeu zhinji, musakuerenga kuita chiro asi kudakara". Ngenyi uchisisira kudakara kudaro? Ngokuti unokunda zvega.

Saka ukashongana nezvinotsvaka kukushaishidzira, iwewe ingoereketa weiti, "Mambo wangu. Ndinomubonga. Izvi ndizvo zvendakabarirwa izvi". VaRoma yechisere ndima yemakumi mairi nechisere inoti, "Nesu tinozia kuti zveshe zvinoshanda pamwepo kuita zvakanaka kwavari avo vanomuda Mwari, avo vakadaidzwa kudai ngokuemesa kwake". Ndizvo iwewe aukoni kukoneswa kuita zvounoda. Aukoni kukoneswa kuona zvounoda. Iri ndiro gwinyiso. Tsamba yaJohani yokutanga chitsauko chechishanu ndima yechirongomuna inoti, "Ngokuti kunyazwi ngechiri chakabarwa ndiMwari chinonyisa nyika. Nouku ndikwo kunyisa kwakanyisa nyika, ndikwo kugonda kwedu".

Chiro chakabarwa ndiMwari chinonyisa nyika ino. Chiro chakhona angaa iwewe. Angaa mazwi ako. Zvingaa zvishuwo zvako. Angaa mazano ako. Zveshe zvinonyisa nyika ino. Tsamba yaJohani yokutanga chitsauko chechirongomuna ndima yechirongomuna inoti, "Vana vadoko, imwimwi munobva kunaMwari, mwakavanyisa; ngokuti uwo uri mukati mwenyu wakakura kupinda uwo uri munyika". Izvi zvinoronza kuti wakabarwa ndiMwari. Kunyisa kunotoa mungazi yako. Kubudirira kunotoa mungazi yako. Azvikoni kuti ubatirirwe. Uri munyisi.

Nyika yakaemera iwewe. Ndiwe uripo kunasirisa matambudziko ayo. Wakabarwa kuti unyise. Wakabarwa kuti utonge. Uripo kuti simba raMwari rionekwe pouri. VaRoma yechisere ndima yegumi nechipfumbamwe inoti, "Ngokuti ngokushuwira kukurutu zvakasikwa zvinogarira kuoniswa kwevana vaMwari". Iwewe ndiwe umweni wevakororo vaMwari ava.

Kumbira Weiti
Baba vendinoda. Ndinomubonga. Simba renyu rinoonekwa pendiri. Kururama kwenyu kunoonekwa pendiri. Izwi renyu riri kushanda mwendiri. Jesu Kristu vakanyisa Sathani. Vakamunyisa vakandiemerera. Saka ndini ndaa kutorwa sokuti ndakanyisa Sathani uyu. Ndinopona somunhu anozwisisa izvi. Ndinonyisa zviro zvomunyika muno. Ndinozwisisa kuti zviro zveshe zviripo kundidetsera. Ndakabarwa ndimwi. Saka ndakanyisa nyika ino. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
VaFiripi 4 ndima 13
Joshua 1 ndima 9
Isaya 41 ndima 10
VaRoma 8 ndima 37

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church