Usapa Sathani Mukana WoKushanda Mwouri

Chishanu, 13 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Zvino Sathani wakapotera muna Judhasi uwo waizwi Isikarioti, umwe wevari gumi nevairi" (Ruka 22 ndima 3).

Judhasi Isikarioti waiya ari mudzidzi waMambo Jesu. Waiya echitoa umweni wevadzidzi vaJesu. Ivo vaya gumi nevairi. Ndizvo wakahambawo naMambo. Wakazwa zvaifundiswa ndiJesu. Wakaona mioniso yaJesu. Asi Judhasi waida zvokutora zviro zveamweni. Ndiyo yaia tsika yake. Izvi ndizvo zvakaita kuti Sathani apinde mwaari. Wakabata mwoyo wake.

Judhasi uyu ndiye waingwarira mare yaMambo Jesu. Asi waipota echiba mare yakhona. Iyi yaitoia tsika yake. Izvi ndizvo zvetinoziiswa muna Johani yegumi nembiri ndima yechitanhatu. Zvino Sathani unoshandisa tsika dzevanhu. Ndidzo dzaanoshandisa kuvaparadza. Judhasi inga asikazii izvi. Waingofunga kuti waiya akangwara. Asi waiya ari kutoteiwa ngetsika yake iyi.

Judhasi uyu wakazoenda kuvakuru vevaJudha. Wakandootengesa Jesu kwevari. Izvi ndizvo zvetinoziiswa ngeZvinyorwa. Wakazopuwa masoja. Wakandovakhombisa kwaia naJesu. Jesu vaia vari muboka revanhu. Judhasi wakaguma akavatsvoda. Waida kuti masoja azie kuti Jesu vaia vari. Jesu vakamuringira. Vakabva vaereketa. Mazwi avo tinoaerenga muna Ruka yemakumi mairi nembiri ndima yemakumi marongomuna nechisere. Vakati, "Judhasi, wopira ere Mukororo woMunhu ngokuchingamidza ngomuromo". Asi Judhasi aazi kuvhunduka.

Mambo Jesu vakazosungwa. Vakatongerwa kufa. Apa Judhasi ndipo paakazovhunduka. Waiya aa kuzwisisa kushata kwezvaaiya aita. Wakabva andodzisungirira. Ndokutoparara zvemhera nariini. Ndiwo mashandiro anoita Sathani awawo. Unopofomadza vanhu. Echivachengedzera. Echiita kuti vashuwire zviro zvisikazi kunaka. Vechizogumisira vasikachazwisisi zvevari zvemene. Unovaitisa zviro zvevasikatokoni kutsanangura pachezvavo. Vechizogumisira vawira mungozi huru. Ngozi yakhona inenge isikabudiki.

Judhasi waisamboshuwira kua gandanga. Asi wakarera tsika yakashata. Ndookuzvijaidza kushaisha. Zvishaishi azvisiri zvokujairira kuita. Zvinongokuparadza. Kunyazwi zviri zvidoodori. Kune vanhu vakaita saJudhasi nyamashi. Vanhu ava vanokara zveamweni. Vane hasha. Vane ruchia. Kune magandanga ariyo nyamashi. Magandanga aya anotoawo nemhuri. Anotoawo nevabereki. Anotoawo nevana. Uyezve anotodakarirawo vana vadzo ava. Asi vanoita zviro zvisikaitwi ngevanhu. Vechizongogumisira vozvidemba.

Munhu aasisiri kushuwira zviro zvakashata. aasisiri kua netsika yakashata. Ungazogumisira aa kushandiswa ndiSathani. Ndiyo ndaa uchisisira kugara wakangwarira mwoyo wako. Usarekera makaro echikupinda. Usarera hasha. Dzadza mwoyo wako ngeIzwi raMwari. Rekera Mweya Wakachena vakone kushanda mwouri. Pona mukururama. Shandisa Izwi raMwari pakupona kwako. Ndikwo kuti Sathani agarire kuretu newe. Ndikwo kuti asakona kukushandisa.

Kumbira Weiti
Baba vendinoda. Ndinomubonga. Kujeka kweIzwi renyu kunondihambisa mukururama. Mweya Wakachena vari kushanda mwendiri. Vari kuita kuti ndihambewo mukururama. Mwoyo wangu wakadzara rudo. Mipinimidzo yangu inoshuwira zvinokudakadzai imwimwi. Ndinoramba kushandiswa ndiSathani. Ndinoshandisa mazano enyu pakupona kwangu. Ndinoshandisa simba reMweya Wakachena pakupona kwangu. Ndizvo ndinorarama kupona kwakachena. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
Johani 13 ndima 2
Jakobe 1 ndima 14 kuguma 15
VaEfesu 4 ndima 27

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church