Uchagara Uchingonyisa

Chitatu, 25 Kukadzi 2026,

*TAA KUTSVAKA MUSHAISHI WEKUGUMISIRA!. Mare yako inokona kutidetsera pamushando uyu. Itumire ngeEcoCash kuTNI Zimbabwe pa *151*2*7*58225# (Nyora Chiara chako seizwi rimwe)*

"Madambudziko owakarurama mazhinji, asi Mambo Mwari unomununura kubva kwaari eshe" (Nduyo 34 ndima 19).

Tinomboshongana nemiyedzo mukupona. Tinoshongana nezvakaoma. Dzimweni nguwa tinotambudzwa. Dzimweni nguwa zviro zvinonesa. Dzimweni nguwa ngozi dzinokharuka dzatiwira. Asi tinonyisa zviro izvi zveshe. Izvi ndizvo zvetinoziiswa muna vaRoma yechisere ndima yemakumi matatu nechinomwe. Inoti, "Haiwa, ... tiri vanopinda vanyisi". Wakanyisa nhamo dzakhona dzisati dzauya. Ndizvo usavhunduka. Pona somunhu anogonda ndiMwari. Ita somunhu akanyisa.

Mambo Jesu vane mazwi evakamboereketa. Tinoaerenga muna Johani yegumi nechitanhatu ndima yemakumi matatu nechitatu. Vakati, "... Munyika munozoa nemadambudziko. Asi shingai mwoyo; ndainyisa nyika". Mambo Jesu vakakuda nyika ino. Iwewe waiya uri mwevari pevakainyisa kudaro. Kuronza kuti iwewe wakanyisa nyika ino. Wakanyisa ngozi dziri mweiri. Wakatonyisa gaa racho. Ndizvo zviro zvingauya hazvo nyamashi. Zviro izvi zvingatsvaka kukushaishidzira. Asi iwewe wakazvinyisa karetu. Zvichapinda hazvo.

Mambo Jesu vane mazwi evakamboereketa. Apa vaiya vari kusungwa. Tinoerenga mazwi akhona muna Ruka yemakumi mairi nemairi ndima yemakumi mashanu nechitatu. Vakati, "Asi iri riri awa renyu neresimba rechidima". Nguwa yakhona yakatopinda hayo. Yaiya isikazi kureba. Mukororo waMwari wakazobuda muiba. Ndiye waa kutonga izvozvi. Uchatonga mhera nariini. Echiita kuti tinyise zviro zveshe zvetinoshongana nazvo. Izvi ndizvo zvetinoziiswa mutsamba yechipiri kuna vaKhorinte chitsauko chechipiri ndima yegumi nechirongomuna. Inoti, "Asi ngaabongwe Mwari, uwo munaKristu unotitungamirira.........mukufora kwokunyisa kwaKristu . ...". Hareruya!

Zviro zvingaoma hazvo. Asi iwewe usazvibvunza uchiti, "Asi ndine zvendakashaisha kai? Ngenyi ndiri kutambudzwa kudai?" Mukupona mune zviro zvinotsvaka kutishaishidzira. Asi iwewe wakazvinyisa karetu. Ndizvo ausisiri kuneseka ndizvo. Iwewe waa munaKristu. Zviro izvi azvikoni kukudusa pana Mwari. Azvisisiri kutsandura zvouri. Tsamba yechipiri kuna Thimothi chitsauko chechitatu ndima yegumi nemairi inoti, "Ngegwinyiso naavo veshe vanoda kuhamba ngokururama muna Kristu Jesu vanozotambudzwa".

Jakobe yokutanga ndima yechipiri inotiziisa zvetinosisira kuita. Inoti, "Hama dzangu, naapo mwogumirwa ngokuedzwa kwembeu zhinji, musakuerenga kuita chiro asi kudakara". Ngenyi uchisisira kudakara? Ngokuti apana muyedzo ungakukurira. Apana dambudziko ringakukurira. Wakabarwa kechipiri. Apa ndipo pewakabarwa waa munyisi. Isaya yemakumi marongomuna nechitatu ndima yechipiri inoti, "Naapo wechiambuka ngomumvura, ndinozoapo newe; peunopinda mundwizi adzizokunzvaidzi; naapo peunopotya mumuriro, auzopishwi, nomurazvu auzokupedzi".

Saka zviro zvingaitika hazvo. Zveshe zvinenge zviri kutokudetsera. Mukuru wakhona ndiye ari mwouri. Wakakura kupinda ari munyika. Izvi ndizvo zvetinoziiswa mutsamba yaJohani yokutanga chitsauko chechirongomuna ndima yechirongomuna. Zwisisa kuti unonyisa zvega. Azvina mushando kuti chiinyi chewashongana nacho.

Kumbira Weiti
Baba vendinoda. Ndinomubonga. Mwakandipa Izwi renyu. Izwi iri rinondigwinyisa. Rinondingwarira. Zviro zvingaitika hazvo. Asi inini ndinoema ndakagwinya. Ndechigonda ndiMwari. Ndechizia kuti mwakandiita munyisi. Shoko renyu ndiro rendinogonda ndiro. Shoko iri arikundikani. Imwimwi munondidakarira. Uyezve simba reMweya Wakachena riri kushanda mwendiri. Ndinodakara nguwa dzeshe. Ndiri muna Kristu. Ndizvo ndinozia kuti ndinonyisa nguwa dzeshe. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
2 VaKhorinte 4 ndima 17 kuguma 18
1 Johani 4 ndima 4
Nduyo 91 ndima 7

(Zvafundiswa izvi zvatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Munoriona pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church