Jesu Ndivo Izwi Retakatumirwa NdiMwari

Chishanu, 9 Chivabvu 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

Pakutanga waiyapo Izwi, neIzwi waiya naMwari, neIzwi waiya Mwari. (Johani 1 ndima 1).

Mundima yetabeura ndiyo mune izwi rinoti, Izwi. Izwi iri rinoturikirwa kubva kuizwi reChigiriki. Izwi reChigiriki rakhona rinoti, Logos. Izwi iri rinoronza izwi. Iri ringaa izwi raronzwa ngomunhu. Kana izwi riri mumipinimidzo yomunhu. Kana izwi ratumirwa munhu. Asi rinonyanya kuronza izwi ratumirwa munhu.

Erenga Johani yokutanga ndima yokutanga kuguma yegumi nechirongomuna. Inokuziisa kuti Jesu ndivo Izwi raMwari. Kuronza kuti muna Jesu ndimwo mune mipinimidzo yaMwari yeshe. Ndimwo mune mazano avo eshe. Pana Jesu ndipo petinoonera mipinimidzo yaMwari. Ndipo petinoonera mwoyo waMwari Baba. Ndizvo ungada kuzia zvinopinimidzwa ndiMwari. Ringira pana Jesu. Hareruya!

Johani 1 ndima 9 kuguma 11 ine zveinotironzera. Zviro izvi zvinoshamisa yaamho. Inoti, Kujeka ukwo kwaiya kujeka kwegwinyiso, ukwo kunojekisa vanhu veshe vanobarwa munyika. Waiya munyika, nenyika yakasikwa kubudikidza ndiye, asi nyika aizi kumuzia. Wakauya munezvake, nevanhu vake avazi kumuashira. Ndizvo Izwi raMwari rakauya munyika. Rakauya kuvanhu varo. Asi vanhu vakhona avazi kuriashira. Izwi iri rakaita maurirei?

Rakauya nevaprofita vekaretu. Umweni muprofita wakhona waiya ari Mosi. Umweni Samueri. Umweni ndiJeremia. Umweni ndiIsaya. Umweni ndiEzekieri. Nevamweni vakawanda wanda. Asi vanhu avazi kuashira Izwi iri. Asi Johani yokutanga ndima yegumi nechirongomuna inozoti, NeIzwi wakaita munhu, wakagara pakati pedu, nesu takaringira uthende hwake, uthende huri hwouwo wakabarwa ega ndiBaba akadzara ngenyasha negwinyiso. Chiona zvakazoitwa ndiMwari. Izwi riya rakazotsanduka. Rikaa munhu wenyama. Ndiye munhu uya unozwi Kristu Jesu.

Asi kune vaisiashira izwi raitumwa ndiMwari iri. Vanhu ava vakaashira kuti vaiya vachazomuka kubva kwevakafa. Vechiona kupona kusikaperi. Abrahama ngoumwenizve wevanhu ava. Dhavhidha ngoumwenizve. Vaprofita vekaretu vakaronzawo ngezvokumuka uku. Vaizia kuti vanhu vachamuka kubva kwevakafa. Uyezve vakazviashira. Pane ngirosi yakatomboziisa Dhanieri zviro izvi. Yakamuronzera ngepadera pevanhu vaiya vachazomuka kubva kwevakafa. Vamweni vechiwana zvifumiso. Vamweni vechirashwa. Tinoona izvi muna Dhanieri yegumi nembiri.

Izwi iri rakazotsanduka. Rikaa munhu wenyama. Rikagara pakati pedu. Izvi zvinoshamisa yaamho. Zvinoronza kuti izwi riya rakazwikwa ndiMosi. Iroro raakazwa rechiereketa riri muchikwenzi. Icho chikwenzi chiya chaibaka. Nemazwi eshe aya aakapuwa ndiMwari. Awawo aakanyorera vana vaIsuraeri. Pamwepo nemazwi evaprofita vekaretu. Mazwi eshe aya akazoungana. Akatsanduka. Akaa munhu wenyama. Munhu wakhona ndiye unozwi Jesu. Mwari ngavakudzwe saMwari nokusikaperi.

Pupura Weiti

Mambo Jesu vakafumiswa. Igwinyiso muri vakuru. Mwakakodzera kuirikidzwa. Ndimwi Izwi raMwari. Rona izwi riya rakatsanduka. Rikaa munhu wenyama. Umwari hweshe hunowanikwa mwamuri. Pamuri ndipo panoonekwa mipinimidzo yaMwari. Ndipo panoonekwa mazano avo. Ndimwi kupona kusikaperi. Pomuri ndipo panoonekwa mwoyo waMwari. Ndipo panoonekwa kururama kwavo. Ndipo panoonekwa rudo rwavo. Nenyasha dzavo. Norunako rwavo. Netsitsi dzavo. Ndimwi Izwi raMwari. Rona izwi riya rinogara nokusikaperi. Ndinokudai nokusikaperi. Ameni.

Dzimweni Ndima Dzinotsinhira Kufunda KwaNyamashi:
Johane 1 ndima 9 kusvika 14
1 Johane 1 ndima 1 kusvika 3

(Chidzidzo ichi chatorwa kubva mu:
Rhapsody of Realities (Ndau)
Rinonyorwa na:
Mufundisi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa: https://bit.ly/Shona_Church