Ereketa Mazwi AMwari

Muvhuro, 16 Gunyana 2024

*Tiri kuda kugumisa zvinofundiswa izvi kuvanhu veshe, pashi reshe.* Chipo chako kudetsera pamushando uyu. Unokona kuchituma neEcoCash pa: *151*2*6*58225# Mwari vakufumisei

Asi iye wakamupingura, akati, Kwakanyorwa kuti, Munhu aazorarami nechingwa chega, asi ngemazwi eshe anobuda mumuromo maMwari (Mateu 4 ndima 4).

Mundima iyi mune izwi rinoti, mazwi. Izwi iri rinoturikirwa kubva kuizwi reChigiriki. Izwi reChigiriki rakhona rinoti, Rhema. Izwi iri rinoronza mazwi. Aya mazwi aMwari hawo. Asi Mwari avasirivo vanenge vari kuereketa mazwi aya. Munhu ndiye unenge uri kuaereketa. Asi unenge aapuwa ndiMwari. Izvi ndizvo zvounosisira kuita. Une mazwi ounosisira kuronza. Asi mazwi akhona anosisira kunge abva kunaMwari. Unosisira kunge waapuwa ndiMwari.

Inini ndakakasira kuzwisisa chiro ichi. Ndakazia kuti ndinosisira kuereketa mazwi aMwari. Ndikwo kuti ndikone kunasirisa zviro zvangu. Saka Mwari vangaereketa havo mazwi. Izvozvo zvega azvina zvazvinonasirisa panyika. Inini ndinosisira kutora mazwi avo aya. Ndoaronza ndemene. Ndikwo kuti zviro zvinasirisike panyika pano. Saka dangani pangaita zviro. Zviro zvakhona zvingaa zviri kutsvaka kukushaishidzira. Tanga wazwa zvinoronza Mweya Wakachena. Wobva waereketa mazwi aMweya Wakachena aya. Mazwi aya ndiwo anozonasirisa zviro zvako.

Saka kumbira ngedzimweni ndimi. Mweya wako unobva wamuka. Uchitanga kunyasa kuzwa zvinoronzwa ndiMwari. Ramba wakateerera kudaro. Uchazozwa mazwi emene ounosisira kuronza. Iwewe wobva waronza mazwi aya. Maronze wakashinga. Uchizia kuti Mwari ndivo vanenge vari kutoereketa.

Karakadza zvakamboereketwa ndiMwari. Vaiya vari kuronza izvi kuna Mosi. Vakamuronzera pevaiya vari kumupa Aroni. Vaimupa Aroni uyu kuti amudetsere. Tinoerenga mazwi akhona muna Ekisedhusi 4 ndima 15 kuguma 16. Inoti, Unozoereketa kwaari, uise mazwi mumuromo wake; neni ndinozoa nomuromo wako nomuromo wake, ndinozokudzidzisa icho chounozoita. Unozoita muereketeri wako kuvanhu: naye unozoita muromo wako, newe unozoita kudai ndiMwari kwaari. Ndizvo munhu akaashira mazwi kubva kunaMwari, munhu uyu ndiye unenge ane Izwi raMwari. Saka unenge akaita saMwari. Unenge akaema pandau yaMwari. Asi pangazoita umweni unozoronza izwi iri kuvanhu. Munhu uyu ndiye unenge echiita semuprofita. Ndiye unenge akaema pandau yemuprofita.

Asi munhu wakhona unokona kunge echingoa umwe ega. Oita ndiye unoashira Izwi raMwari. Echizorironza ari iye. Ndizvo zvaida Mwari kuti Mosi aite. Ndiye waisisira kuashira Izwi raMwari. Ndiye waisisira kuzorironza kuvanhu. Kuronza kuti ndiye waisisira kuronza mazwi aMwari. Izvi ndizvo zvounosisira kuitawo iwewe. Ereketa mazwi aMwari. Ndikwo kuti unyise zviro zvomunyika muno. Ndikwo kuti unyise gaa. Ndikwo kuti unyise zveshe zvoungashongana nazvo.

Kumbira Weiti
Baba vendinoda. Ndinomubonga. Munondipa izwi renguwa imwe ngaimwe. Iroro izwi rinobata zvinenge zviri kuitika panguwa iri ngeiri. Ngokudaro ndinonyisa saMwari. Ndinonyisa kudaro zuwa rimwe ngarimwe. Ndinokumbira ngendimi. Ndinobva ndaona zviri mumweya. Ndechiwana Izwi renyu. Ndechizoereketa Izwi iri ndakashinga. Ndechizia kuti rinoshanda. Ndechizia kuti Izwi iri rine simba. Rinokona kunasirisa zviro. Rechiita kuti zviro izvi zviwirirane nezvemwakaronga imwimwi. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
Varoma 10 ndima 8
VaEfeso 6 ndima 17
Isaya 55 ndima 11
Vahebheru 4 ndima 12

(Chidzidzo ichi chatorwa kubva mu:
Rhapsody of Realities (Ndau)
Rinonyorwa ndi:
Mufundisi Chris Oyakhilome DSc DD.
Mungoriwana pa: https://rhapsodylanguages.tniglobal.org/regions/
Zvimweni zvinofundiswa munozviona pa: https://bit.ly/Shona_Church