Koshesa Mushando Wewakapuwa NdiMwari

Chitatu, 15 Gumiguru 2025

*Tiri kuda kugumisa zvinofundiswa izvi kuvanhu veshe, pashi reshe.* Chipo chako chinokona kudetsera pamushando uyu. Unokona kuchitumira ngeEcoCash pa:: *151*2*6*58225# Mwari vakufumise

Kunyazwi chiinyi chomunozoita shandai ngomwoyo, kudai ngevanoshandira Mambo, haiwa vanhu, mwechizia kuti munozoashira musharo wenhaka kubva kunaMambo. Munoshandira Mambo Kristu (VaKhorose 3 ndima 23 kuguma 24).

Kune vanhu vanoarairwa. Vechigumisira vaduswa pazviro zvakakosha. Vanhu ava vakatowanda. Vanowandirwa ngemishando. Kana kuneseka ngezviro zvisina mushando. Vechirumbirira zviro zvomunyika muno. Vechizogumisira vasiya mishando yevakapuwa ndiMwari. Kuarairwa akuzi kunaka. Kunokudusa pazviro zvakakosha. Kunokudusa pamushando wewakapuwa ndiMwari. Ndizvo gara wakangwarira. Usikaaraidzwi ngezviro zvisina mushando.

Mwari vane mushando wevakakupa. Mushando uyu ndiwo wevanoda kuti uite. Mushando unosisira kuitwa ndiwe wega. Asi dangani ungasauita. Uchazosisira kutsanangurira Mwari kuti ngenyi usikazi kuuita. Ndizvo koshesa mushando uyu. Mambo Jesu vane mazwi evakaronza. Tinoaerenga muna Johani yechirongomuna ndima yemakumi matatu nerongomuna. Inoti, Kudya kwangu ndikwo kuita kuda kwouwo wakandituma nokupedza mushando wake. Vakaronzazve muna Johani yepfumbamwe ndima yechirongomuna. Vakati, Kunosisira kuti tishande mishando youwo wakandituma achimasikati; ngokuti usiku hunouya, naapo apana ungakona kushanda.

Ndizvo Mwari vakakupa mushando. Uyu mushando wokudetsera kuti Vhangeri rigume kuvanhu. Uri kuita mushando wakhona ere? Wakaronga kuupedza ere? Phauri waipinimidzawo saMambo Jesu. Iye waisatenda kuaraidzwa. Ndizvo wakatsamwirira kuita mushando wake. Izvi ndizvo zvetinoona muna vaFiripi yechitatu ndima yegumi nechitatu kuguma gumi nerongomuna. Inoti, ndinoriarwa zviri sure nokunanambira zviri mberi, ndinogwinyisira kuenda kumagumisiro, koopuwa chipo chokudaidzwa kunobva mudenga kuri muna Kristu Jesu.

Phauri une imwenizve yambiro yaanotipa. Yambiro yakhona inoonisa zvaaiita iye pachezvake. Tinoierenga muna vaHebheru yegumi nembiri ndima yokutanga. Inoti, Ngatirashe zveshe zvinodzimbira nokushaisha kunotibatirira, ngatirumbe ngokusengerera mujaho wakaemeswa pamberi pedu. Phauri wakazopedza mushando wake. Tinoerenga mazwi ake mutsamba yake yechipiri kuna Thimothi chitsauko chechirongomuna ndima yechinomwe. Wakati, Ndarwa kurwa kwakanaka, ndapedza mujaho, ndangwarira kugonda. Newewo unosisira kupedza mushando wako. Izvozvo ndizvo zvakanyanya kukosha.

Usariarwa mushando wewakapuwa ndiMwari. Tendeka kuita mushando uyu. Gara uchitsamwirira kuuita. Mwari vanoda kuti tipedzise kuchumaira Vhangeri pashi reshe. Iwewe une ndima yako pamushando uyu. Tsamwirira kupedza ndima yako iyi. Kudakara kwako kunosisira kua pakuupedza. Mwari ngavairikidzwe!

Kumbira Weiti
Baba vendinoda. Ndinomubonga. Mune mushando wemwakandipa. Ndinoramba kushaishidzirwa ngevanhu kuita mushando uyu. Ndinoramba kushaishidzwa ngezviro zvomunyika muno. Ndinotsamwirira kupedza mushando uyu. Ndinoita mushando wakhona ngemwoyo weshe. Chinondidakadza kupedza mushando uyu. Ndechiita kuti zina renyu rikudzwe. Muzina raJesu. Ameni.

Dzimweni Ndima Dzinotsinhira Kufunda KwaNyamashi:
2 Timoti 4 ndima 7
Mabasa 20 ndima 24
Johane 17 ndima 4

(Chidzidzo ichi chatorwa kubva mu:
Rhapsody of Realities (Ndau)
Rinonyorwa na:
Mufudzi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa: https://bit.ly/Shona_Church