Mwari Vakakusika Wakaperera

Svondo, 28 Zvita 2025

*Tiri kuda kusvitsa dzidziso iyi kuvanhu vose, pasi rose.* Chipo chako chinogona kubatsira pabasa iri. Unogona kuchituma neEcoCash pa: *151*2*6*58225# Mwari vakuropafadze

“Ngokuti isusu tiri mushando wake, takasikirwa munaKristu Jesu . …” (VaEfesu 2 ndima 10).

Mwari vakakusika wakaperera. Wakambozvifungawo ere izvozvo? Vakakusika usina pakaremara. Usina chousikakoni kuita. Pasina chingakusunga. Ivo vakakusika nohunyanzvi hwavo. Apana chinotamika pouri. Une zveshe zvinodiwa. Izvi ndizvo zvevaiya vakakurongera. Ndizvo zvevaida kuti uve zvemene. Ndizvo zvevachiri kuda kuti uve nanyamashi.

VaHebheru yegumi ndima yegumi nerongomuna inoti, “Ngokuti ngokupira mudiro umwe iye wakavaita vakaperera mhera nariini avo vakacheneswa”. Iwewe ndiwe ari kuronzwa mundima iyi. Wakasikwa wakaperera. Ndizvo uchagara wakaperera mhera nariini. Apana chinosisira kututsirwa pouri. Apana chinosisira kunasiriswa pouri. Hareruya! Dhavhidha waizwisisawo izvi. Tinozviona muna Nduyo yezana nemakumi matatu nepfumbamwe ndima yegumi nerongomuna. Inoti, “Ndinokukudza, ngokuti ndakasikwa ngenjira inotyisa neinoshamisa. Mishando yako inoshamisa; izvo mweya wangu unonasa kuzia yaamho”. Iwewe uri munhu akaperera. Ndiwo maonerwe ounoitwa ndiMwari. Avana chevanoona chisiripopi pouri. Avana chevanoona chakaremara mwouri.

Izvi zvinotikarakadzisa Muchumairi yechitatu ndima yegumi nerongomuna. Inoti, “Ndinozia kuti kunyazwi chiinyi chaanoita Mwari chinogara mhera nariini; apana chingatutsirwa kwechiri, nokuti chiro chingaduswa kubva kwechiri …”. Zvinosikwa ndiMwari zvinogara mhera nariini. Avana chevanosika chakaremara. Ivo ndivo vakakusika. Avazi kuronga kuti itsvo dzako dzipote dzechimborekera kushanda zvakanaka. Avazi kuronga kuti mwoyo wako upote uchikunesa. Avazi kuronga kuti maphaphu ako apote echidzarirwa. Avazi kuronga kuti ngazi yako ipote ichiita matenda.

Avazi kuronga kuti muiri wako upote uchirwara. Ivo vanosika zviro zvavo ngomwazvo. Ndizvo vakakusika une utano hwakanaka. Genisisi yokutanga ndima yemakumi matatu naimwe inoti, “NaMwari wakaona zveshe zvaaiya aita, kuti zvaiya zvakanasa kunaka …”. Ndizvo Mwari vakasika zviro. Vakabva vazviringira. Vakaona kuti zveshe zvaiya zvakanaka yaamho. Apana nachimwe chazvo chaiya nepakakombama. Ndiwo maonero ounosisirawo kuzviita iwewe.

Wakasikwa wakaperera. Nhengo dzako dzeshe dzakaperera. Imwe ngaimwe inoshanda zvakanaka. Wakadzara zvakanaka zvega. Iwewe waa munaKristu. Waa wedzinza reVamwari. Ndizvo wakaperera. Une zveshe zvinodiwa. Izvi ndizvo zvetinoziiswa muna vaKhorose yechipiri ndima yegumi. Ndiyo ndaa uchisisira kuramba kurwara. Ramba kukundikana mukupona. Apana chinosisira kukukonesa kuwana zvounoda. Apana chinosisira kukukonesa kuita zvaounoda. Tonga Sathani. Tonga vabati vake veshe. Tonga zviro zvomunyika muno. Iwewe uri pfuma yaMwari. Wakarurama. Unoera. Zina ravo ngarinamatwe nokusikaperi.

Kumbira Weiti
Baba vendinoda. Ndinomubonga. Imwimwi ndimwi mwakandisika. Mwakandisika ndakaperera. Ndakanaka. Pasina chinotamika mwendiri. Mwakandisika kudaro muna Kristu Jesu. Mwechitsvaka kuti ndiite mishando yakanaka. Ndinonyisa zvendinoshongana nazvo mukupona. Ndinobudirira pane zveshe zvendinoita. Ndinopona ndiri mutano. Ndakarurama. Ndiri munaKristu. Ndine zveshe zvinodiwa. Ndiri wengazi yenyu. Ndiri wedzinza renyu. Muzina raJesu. Ameni

Dzimweni Ndima Dzinotsinhira Kufunda KwaNyamashi:
Jakobo 1:18; 1 Petro 2:9 AMPC; Tito 2:14

(Chidzidzo ichi chatorwa kubva mu:
Rhapsody of Realities (Shona)
Rinonyorwa na:
Mufudzi Chris Oyakhilome DSc DD.
Munoriwana pa: https://rhapsodylanguages.tniglobal.org/regions/
Zvimwe zvidzidzo munozviwana pa: https://bit.ly/Shona_Church)